搜龙体育: 真大英帝星夏利卡尼

2020.12.08 -

职业体育嘅打比战好多时都唔可以从双方赛前嘅排名或者实力高低去预计胜负,毕竟一场令人瞩目嘅对决局面上必然变幻莫测,然而有啲嘢注定冇得逆转,就系求胜渴望程度嘅差异。今季英超首循环北伦敦打比今日凌晨决出雌雄,胜利天秤沉向强者,尽管热刺控球率、传送成功率以及射门数等其他方面睇落好似处于下风,但结果又系一场典型嘅「摩式」胜仗,两波一针见血嘅反击封杀任何爆冷可能性。摩连奴安排众将士以低姿态贯彻战术当属成功根基,孙兴民打开纪录嘅世界波固然之令人回味无穷,不过成场波踢完,更值得大家兴奋嘅无疑系佢——夏利卡尼。

日前呢场北伦敦打比,夏利卡尼第一个贡献系为最佳拍档孙兴民送出无需思前想后就可以长驱直进嘅直线球,其实喺呢脚出波之前,对面嘅阿仙奴一度形成半场围攻之势,得益于队友解围过程中连续摆渡,夏利卡尼中圈附近停球、转身、出脚,3个考验基本功嘅动作一气呵成。第二次建功就彰显佢当年坐庄联赛金靴得主本色(2015-17赛季),卢施素中场接后方队友解围,眼见身前空旷快速推进过半场,热刺快攻四打二,孙兴民一轮插花之后送出短传,而喺窄角度位置接应嘅夏利卡尼信心爆棚大力抽中门楣底弹入。

综观夏利卡尼成名以嚟一向畀人印象速度唔系特别快,不过今日一次极具穿透力嘅输送令佢成为近5个赛季英超最快助攻数突破双位数,一记「勐虎射门」达成仅次于美斯、职业生涯第二快攻入250球嘅里程碑,咁高质嘅效率以及耀眼演出点会唔令人惊歎。其实喺佢「重返」巅峰嘅背后,有冇人记得佢嘅辛酸?过去2个赛季,每当热刺进入关键赛程,夏利卡尼不幸遭遇大伤,而前届欧冠决赛面对利物浦火线复出但毫无建树可谓过去接近两年时间内迷失期嘅缩影。摆脱咗今年上半年嘅大伤,夏利卡尼今季完成蜕变,以往佢嘅定位系入波机器,不过宜家角色已经好大变化。回顾热刺过去11场联赛之所以杀出重围同利物浦一齐竞逐积分榜头把交椅,夏利卡尼喺场上主要负责回撤中场疏导球路,兼顾部分高位迫抢嘅行动,成功解决咗热刺近几个赛季中场控制力持续落坡嘅困扰,简单概括佢已经进化成为「披着正前锋皮囊嘅前腰」,支点价值早就唔可以用入波产量嚟衡量。

由夏利卡尼今季嘅转型唔少人会联想到英格兰国家队,修夫基(Gareth Southgate)都系时候要深入探讨下出年欧国杯要点样摆阵喇。其实明眼人都清楚,英格兰有好多天才横溢嘅后生攻击手,拉舒福特、积顿辛祖等等,不过三狮军团已经好多年未问鼎过洲际大赛又或者登上最终决战舞台,好明显就系中前场发动机一环唔够动力,喺非常深入阶段遇到嘅对手,相信冇话边队嘅短板会系呢个位置。换言之,如果球迷可以睇到夏利卡尼出年欧国杯决赛周可以司职佢今时今日喺热刺嘅角色,相信英格兰会有一番突破性作为嘅,不过前提系呢位大英帝国超级前锋保持健康,以及热刺今季最终会爬到边个高度,先可以决定佢值唔值得担当重任,成为三狮军团真正嘅「十号」。

- END -

63
0

搜龙运势:金牛座屋好墙壁稳,凡事稳当无险

乙巳日,木火之日,对秋冬出生之人较有利,做事较柔,较顺畅。 仁属木,有仁者,种善因,得善报。仁爱为接物之本。 […]

%d 博主赞过: